By Kaif - Aug 04, 2025 06:36 PM
Image Source: X
Janiye: Gill aur Brook dono ko Player of the Series kyun chuna gaya?: India aur England ke beech Anderson-Tendulkar Trophy ke liye kheli gayi paanch match ki Test series 2-2 se draw ho gayi. Team India ne The Oval mein ek romanchak 6 run ki jeet darj ki aur England ke series jeetne ki umeedon ko tod diya.
Aakhiri din, host team 4 wicket haath mein hone ke baad bhi 35 run nahi bana saki aur India ko ek yaadgaar jeet mili. Is series mein kai khiladiyon ne kamaal ka performance dikhaya, lekin England ke Harry Brook aur India captain Shubman Gill ko Player of the Series chuna gaya. Kai fans soch rahe honge ki do khiladiyon ko yeh award kaise mil sakta hai, toh chaliye aapko iske peeche ki wajah batate hain.
Image Source: X
Why 2 players become player of the series in IND vs ENG: England mein Test Series ke dauran ek lambe samay se chali aa rahi parampara ke anusaar, 'Man of the Series' (MOTS) award dono teams ke ek-ek khiladi ko diya jaata hai. England ki taraf se yeh award Brook ko diya gaya, jabki Indian team ke captain Gill ko yeh award mila.
Yeh selection opposition team ke coach dwara kiya jaata hai, yaani Gautam Gambhir ne Harry Brook ko award dene ka faisla kiya, jabki Brendon McCullum ne Gill ko vijeta ghoshit kiya.
Also Read: Most runs and wickets in India vs England 2025 Test series
Image Source: X
Shubman Gill ka balla khoob chala. Gill ne daure ki shuruat dhamakedaar shatak ke saath ki thi. Iske baad, Edgbaston Test mein bhi dono innings mein kamaal kiya aur double century lagane ke baad doosri innings mein bhi century jodi. Lord's mein Gill ka kamaal dekhne ko nahi mila, lekin Manchester mein unke balle se shatkiya paari aayi. Halanki, Oval mein Gill dono innings mein kuch khaas nahi kar paaye. Iske bawajood woh series mein sabse zyada run banane wale batsman rahe. Gill ne 5 Test ki 10 innings mein 75.40 ki average se 754 run banaye, jismein 4 centuries shamil rahi.
Image Source: X
India ke khilaf Test series mein Harry Brook ne bhi kamaal ki batting ki. Oval mein 91 balls par lagaya gaya shatak hi match ke romanchak hone ki wajah tha. Iss young batsman ne 5 matches ki 9 innings mein 53.44 ki average se 481 run banaye. Is dauran 2 shatak aur 2 ardhshatak bhi jode.
Also Read: Watch IND vs ENG 5th Test Highlights, India won The Oval Test by 6 runs
Give Your Feedback