Image Source: X
Tennis player Radhika Yadav killed by her father in Gurugram: Haryana ke Gurugram ziley mein tennis khiladi Radhika Yadav ki hatya kar di gayi. Radhika ki hatya unke pita ne ki. Radhika ke pita ne use goliyon se bhoon dala. Tennis ki duniya mein Bharat ki ore se ubharte hue chehron mein shaamil rahi Radhika Yadav na keval ek talented khiladi thin, balki ek inspirational Khiladi bhi thin. Haryana se talluk rakhne wali Radhika ne apne shandar khel se rashtriya aur antarrashtriya star par pehchan banayi.
Jaaniye Radhika Yadav Kaun Thi?
Image Source: X
- Radhika Yadav ek ubharti hui Bhartiya tennis khiladi thin, jinka janam 23 March 2000 ko hua tha. Unhone International Tennis Federation (ITF) ki doubles ranking mein 113th sthan prapt kiya tha aur Haryana ki mahila doubles shreni mein vah paanchvein sthan par rahin.
- AITA (All India Tennis Association) ki Under-18 shreni mein January 2018 mein unhone apna sarvochch rank 75 hasil kiya tha aur lagatar 11 hafton tak Top 100 mein bani rahin. Mahila singles mein unki sarvashreshth ranking 35 aur doubles mein 53 rahi.
- 25 varshiya Radhika ko Shrivalli Bhamidipati, Poorvi Bhatt, aur Thaniya Sarai Gogulamanda jaisi pratibhaon ke saath Bharat ki ubharti tennis khiladiyon mein gina jata tha.
- Radhika ne ek lokpriya tennis academy bhi shuru ki thi, jise lekar unke pita nakhush rehte the. Bataya gaya ki ve aksar Radhika ki kamayi par ashrit hone ke taane sunte the.
- Iske alawa, Radhika ko Instagram par reels banana pasand tha, aur ek reel ko lekar unke pita naraz bhi hue the aur unhone use hatane ke liye kaha tha.
Radhika Yadav ko unke Father ne goli kyon maari
Image Source: X
Sector-57 ke Sushant Lok-2 mein Brihaspativar ki subah kareeb 11:30 baje mahila tennis khiladi ko uske pita ne teen goli maarkar hatya kar di. Praarambhik jaanch mein saamne aaya hai ki tennis khiladi ke academy chalaane par naraazgi ke chalte pita ne licensed revolver se uski peeth mein goli maar di. Radhika Yadav ko gambhir haalat mein ek private hospital le jaaya gaya, jahan upchaar ke dauraan uski maut ho gayi.
Mritaka ki pehchan rajya stariya tennis khiladi Radhika Yadav (kareeb 25 varsh) ke roop mein hui hai, jo ki apne parivaar ke saath Sector-57 sthit Sushant Lok-2 mein rehti thi. Mritaka Radhika ek tennis academy chalaati thi aur uske pita (aaropi) tennis academy chalaane ki baat se khush nahin the.
Radhika ke saath tennis academy chalaane ko baat par hue vivaad ke chalte Brihaspativar ko Radhika Yadav ke pita ne gusse mein aakar apni licensed revolver se teen goli uski peeth mein maar di. Goli lagne ke baad Radhika ka chacha Kuldeep aur chachera bhai use gambhir roop se ghayal avastha mein private hospital lekar gaye, jahan uski maut ho gayi.
Also Read in English: Radhika Yadav Shot Dead by Father in Gurugram Over Dispute
About the Author:
Kaif Ansari
