Image Source: X
Bharat mein Phalgun Purnima ke pavan avsar par Holika Dahan ka utsav manaya jata hai, jo burai par achhai ki jeet aur nakaratmakta ke ant ka pratik hai. Is saal, yani 2026 mein Holika Dahan 2 March ki raat 12:50 baje ke baad kareeb 150 sthanon par manaya jayega. Iske agle din, 4 March ko, Dhulendi ka tyohar dhum-dham se manaya jayega.
Holika Dahan 2026 Kitne Baje Hoga?
Jyotishacharyon ke anusaar, Holika Dahan 2 March 2026 ko raat 12:50 baje ke baad hoga, jo sabse shubh samay mana gaya hai. Phalgun Purnima ki tithi 2 March ko shaam 5:18 baje se shuru ho rahi hai.
Holika Dahan Ki Pauranik Katha
Holika Dahan ki katha Shrimad Bhagwat Purana aur anya prachin granthon mein varnit hai. Kahani is prakar hai:
- Hiranyakashipu naamak atyachaari Asurraj ne swayam ko Bhagwan ghoshit kar liya.
- Uska putra Prahlad param bhakt the Bhagwan Shrihari Vishnu ke.
- Hiranyakashipu apne putra ki bhakti ko swikar nahi kar saka aur use maarne ke kai prayas kiye, lekin har baar Bhagwan ki kripa se Prahlad surakshit rahe.
- Antatah, Hiranyakashipu ne apni behan Holika se kaha ki Prahlad ko god mein lekar agni mein baithe. Holika ko agni se na jalne ka vardaan prapt tha.
- Parantu Bhagwan ki kripa se Holika jal gayi aur Prahlad surakshit bahar nikle.
Is ghatna ko Holika Dahan ke roop mein har saal manaya jata hai. Ye pavan utsav paapon ke nash aur nayi zindagi ki shuruaat ka pratik hai.
Image Source: X
Nakaratmakta Ke Ant Ka Pratik
Holika Dahan humein yaad dilata hai ki hamare andar ke nakaratmak bhav jaise krodh, irsha, lobh, ahankaar ko tyagna chahiye. Agni devta ko sakshi mankar Holika ki parikrama karna atma shuddhi ka pratik mana jata hai.
Holika Dahan Ka Vidhipoorvak Poojan
- Holika Dahan sthal ko shuddh karke lakdiyon ya uple ka dher sajayein.
- Roli, akshat, pushp, jal, gud, haldi, moong, gehun ki baliyan adi se poojan karein.
- Kaccha soot (mouli) Holika ke charo or lapetein.
- Shraddha ke saath Holika ki parikrama karte hue sukh, samriddhi aur santanon ki raksha ki kamna karein.
- Holika ki agni ki raakh ko mathe par lagana shubh mana jata hai, jisse nakaratmak shaktiyan door hoti hain aur jeevan mein sukh-shanti aati hai.
Holika Dahan sirf ek dharmik ayojan nahi, balki ye humein apne andar ki buraiyon ko jala kar nayi zindagi shuru karne ki prerna deta hai. Is saal 2026 mein ise raat 12:50 baje shubh muhurat mein karna bahut phaldayak mana gaya hai.
Also Read: Holika Dahan 2026: Parikrama Kitni Baar Karein? Jaane Sahi Vidhi aur Mahatva
