Image Source: X
America ke hamle ke baad kya karega Iran?: America ke Iran par hamle ke baad Paschim Asia mein bhoo-raajnitik haalaat behad ulajh gaye hain. Aashanka hai ki ab Iran-Israel ke beech shuru hua sangharsh poore Paschim Asia ko apni chapet mein le sakta hai. America ke hamle ke baad ab sabhi ki nigahen Iran par tiki hain.
American Rashtrapati Trump ne apne bayaan mein saaf kaha ki agar Iran America par hamle ka jawab nahi deta hai toh shanti sthapit hogi, aur agar Iran ne jawab diya toh tragedy hogi. Aise haalaat mein Iran-Israel sangharsh kis karvat baith sakta hai aur ismein Iran ke liye kya vikalp ho sakte hain, aaiye jaante hain.
America ke hamle ke baad kya hain Iran ke options?, kya karega Iran
Image Source: X
1st option: America par hamla: Iran, America ke hamle ke baad Paschim Asia mein American nagrikon aur American sainya thikanon par hamla kar sakta hai. Aise mein, Paschim Asia mein maujood America ke sainya thikanon aur American nagrikon ko alert kiya gaya hai. American shaharon mein bhi suraksha vyavastha kadi kar di gayi hai aur aham thikanon ki nigrani badha di gayi hai.
2nd option: Israel par hamle tez: Israel par bhi hamle tez ho sakte hain. America ke hamle ke kuch der baad hi Iran ne Israel par missile hamle kiye, jis par Israel ne bhi palatwar kiya. Ladai tez hone ki aashanka se Israel ne sabhi shaikshik gatividhiyon, logon ke ikattha hone aadi par bhi agle aadesh tak pratibandh laga diya hai. Sirf zaroori cheezon ke sanchalan ki hi manzoori di gayi hai. Aashanka hai ki Israel, Iran ki sainya takat ki reerh Islamic Revolutionary Guard Corps par hamle bhi kar sakta hai.
3rd option: Proxy sangathanon ka hamla: Iran par hamle ke jawab mein uske kathit proxy sangathan Hezbollah aur Hamas bhi Israel par hamle shuru kar sakte hain. Hezbollah ne toh Iran ke samarthan mein Israel par hamle ka elaan kar hi diya hai. Halanki Israel ke hamlon ke baad inki takat behad kam ho gayi hai, lekin ye Israel ki pareshani thodi badha sakte hain.
Image Source: X
Also Read: Israel-Iran war: Kya hai B-2 Stealth Bomber? Jisse America ne Iran par hamla kiya?
4th option: Tel ki keematon mein uchhal: Paschim Asia mein sangharsh badhne ke baad tel ki keematon mein bhi uchhal aa sakta hai. Darasal Iran ne dhamki di thi ki agar ladai mein America shamil hua toh ve Hormuz Jal Damrumadhya (Strait of Hormuz) mein vyaparik jahajon ki aawajahi ko badhit kar denge. Saath hi Iran ke samarthan mein Houthi Vidrohi bhi Lal Sagar (Red Sea) mein vyaparik jahajon par hamle kar sakte hain. Agar aisa hota hai toh iska poori duniya par asar padega.
5th option: Russia aur China ka agla kadam: Russia aur China ne haal hi mein Iran aur Israel se ek doosre par hamle band karne ki appeal ki thi, lekin saath hi kootnitik taur par Iran ka samarthan kiya tha. Russian Rashtrapati Putin ne toh America ko chetavani bhi di thi aur Iran par hamle na karne ko kaha tha. China ne bhi America par sangharsh ko badhava dene ka aarop lagaya tha. Aise mein ab Russia aur China ke agle kadam par sabhi ki nigahen hain.
Also Read: Israel-Iran ki jung mein kaun kiske saath? Jaane India kiski taraf?
About the Author:
Kaif Ansari
